Tranellu de amore de unu emigrante sardu de Baronia (Angheleddu Sulas – Porto Torres) 1. Pro istimare a tie apo emigradu meda lontanu dae sa dimora e tue no as bidu mancu s'ora chi t'asa un'attera mente procuradu sende chi deo t'aia giuradu de ti fagher felice una segnora no as bidu ne ora e ne momentu de farzare su meu giuramentu. 2. Ma deo so cuntentu si bi crese chi tue as fatu cussa iscapriciada t'auguro chi siese fortunada comente tue bramare ti dese mancu partidu non fio unu mese chi tue ti ses prestu collocada ma però deo non mi mustro offesu mezus fuire dae s'oru non dae mesu. 3. Deo so trancuillu in parte mia già chi cun tegus piusu non trato mancu gelosu de te non mi fato non so amante de sa gelosia e non mi ponzo peruna manìa si so lontanu bene mind'agato e non devo chircare pilu in s'ou dognunu faghe su geniu sou. 4. Anzi ti naro e ti fato ischire chi non mi faghe ne fritu ne cardu ma però penso puru chi so sardu non mi devo pro nudda impaurire si tue crasa ti cheres pentire ti naro chi pro te est troppu tardu a mie pius literas no aggiunghese tue l'as fatu e tue lu pianghese. 5. Ispero chi siede una cosa intesa ti devese de me immentigare ca deo puru mi poto isposare si mi piaghede una giermanesa si poi tue ti mustras offesa pro me non b'à pius mediu de t'amare in coro non mi ponzo mancu neu nara su diciu in dogni terra est Deu. 6. Creo chi prestu ti passa sa vua non ti lu naro pro criticare su calore ti benidi a passare deves andare in bidda cuacua gianteris m'ada iscrittu sorre tua nendemi a mie prestu de torrare però l'apo rispostu giustu creo apo a torrare cando cherzo deo. 7. Issa m'à nadu chi sese innozzente azis su tortu e cherides reione ca de accordu sezis in cumone ma deo fato totu indiferente pro cantu campo mi restada in mente s'idea mala 'ostra intenzione forsi creiada chi fio unu tontu como su g'ada si lu tenze contu. 8. Deo mantenzo sa mia idea comente su destinu m'à dotadu però ispero si so fortunadu poto prestu segare sa trobea e tue si ses bella o si ses fea pro parte mia non so imputadu su tortu chi m' as fattu lu cumprendo pius in brazos tuos non mi rendo. 9. Curpa tua chi ses' istada macca chi su perfetu amore t'as perdidu si m'asa carchi basu preferidu non t'à lassadu in buca sa giacca t'ada incantadu s'anzena busciacca dae su primu die chi las bidu ca t'a dadu su braciale de oro tue prestu l'às dadu su coro. 10. Forsi ti cres chi ses bella pizinna non ides s'ora de ti coiuare però creo chi istentes a isposare t'ada a toccare de andare a linna deo pro te non fatto pius pinna non cherzo paperi invanu consumare quindi tue bene considera custa pro me est s'urtima littera. RISPOSTA DE SA FIDANZADA 11. Però caru istimadu amante meu proite mi trattas de custa manera mira chi deo so pro te sinzera no appo in coro atteru recreu si t'ana iscrittu calchi contu feu narami s'autore de sa littera ti prego faghemilu ischire poi toccada a mie a discurrire. 12. Narami si est omine o femina chi t'ada tottu custu raccontadu su bracciale chi m'ana regaladu unu fradile chi fidi in s'Argentina e cussa limba mala serpentina t'à nadu chi fi meu innamoradu si cheres ischire su contu precisu ti prego beni prestu a s'improvisu. 13. Cheria ischire cal'est sa birbante chi t'ada iscrittu tanta pestilenzia pro cussu chi ti cherzo in sa presenzia mira si podes benner a s'istante deo fidele fio e so costante pro ti fagher de tottu connoschenzia beni cuntentu e faghedi seguru e gai so cuntenta deo puru. 14. Non ponzes mente a limbas infernale forsis ana bisonzu de appozu deo camino in s'abba che ozzu e subra a mie non bind'at de male si fradile mi at dadu su bracciale a sorre mia l'at dadu s'orolozzu si crese chi a fradile devo amare deo so pronta a bi lu torrare. 15. Tue iscultare non deves a chie ca su cherveddu meu a tie est fissu fradile meu est bennidu in permissu e deve prestu partire a inie. mira chi deo penso solu a tie e tue non ti ponzas in abissu non ti turbe sa mente calchi nue si nono iscrie a chie cheres tue. 16. Solu cheria ischire su soggettu o veramente chi est sa suggeta ted'essere veramente una civetta chi pone sa bruttura in logu nettu ti prego a tie chi sies perfettu deo pro parte mia so perfetta e non istes pro me a malu mottu si nono benis tue e bides tottu. 17. Tue pensa de non ti ammattanare già ghi ses solu, isconsoladu e affrittu chie t'ada inviadu cussu iscrittu in parte mia lu poto pensare in galera la pottene inserrare pro totta vida senza b'aer delittu e mai no iscontede cussa pena a chie pone fogu in domo anzena. 18. Faghemi ischire prestu sa notizia si ti piaghe de restare inie pro s'ingannu ch'ana giutu a tie a issos bi lu giute sa giustizia chie at fattu s'iscrittu cun malizia mai tenzet reposu notte e die si l'at fattu pro attu 'e gelosia vivat gherrende cun sa martoria. 19. Non ti ponzes perunu pensamentu pro niente ti deves attristare ti prego sanu e forte des torrare comente prego a dogni momentu e ti naro si tue ses cuntentu beninde prestu a mi nde leare bides si appo a postu su giudiziu benzo cun tegus senza isposaliziu. 20. Gai mi naras cal'est cussa crese si ancora l'iscrives e bi trattas sas peraulas mias sunu isattas e ispero chi a mie crese ista seguru si omine sese una femina giusta in me agattas naramilu chi este chi lu firmo sia femina o omine non lu timo. 21. E si faeddo gai appo reione cherzo connoschere cal'est custa ispina non la timo si este una femina e non lu timo si este unu buffone si puru mi che ponene in presone li fatto fagher figura mischina a tale chi sa limba mala ischeddede e gai piusu invanu non faeddede 22. Tue si ses sinzeru mi lu naras chi deo fatto prestu sos concruos ca si non patimos tottos duos senza reione sas penas amaras prego chi cantu prestu mi declaras chi deo devo morrer in brazzos tuos o puru beni prestu a sa presenzia pro ti accertare de sa mia innocenzia. 23. Ma non cherzo ghi restes in disaggiu appena intendes sa mia lamenta deo penso de istare attenta e tue puru faghedi coraggiu e si prestu ti pones in viaggiu deo pro parte mia so cuntenta e tando s'imbrogliu lu purgamus e poi sas limbas malas las pargamus. RISPOSTA DE SU FIDAN2ADU 24. ISCUSA cara amada Annamaria a tie prego de mi perdonare. fio propostu de t'abbandonare curpa de una anzena gelosia però m'ada iscrittu mamma mia a cussa ispina de no la chircare pro curpa sua istadu so gelosu ca mi cheriada issa pro isposu. 25. Però ti fatto ischire e t'asseguro c'apo truncadu prestu sa cadena apo cumpresu ite fi s'iscena deo l'apo a odiare cantu duro de istimare a tie sigo e giuro e sigo a tribagliare in terra anzena custa macca s'est posta a parallella cheriat faghere che Parmeriu a Nella. 26. Tue perdona cantu t'apo offesu non cherzo chi ti ponzes in affannu ca deo inoghe già mi firmo un'annu cantu salude e sorte mi da Gesu su tranellu oramai apo cumpresu bido su mundu ch'est totu ingannu in custu logu tribagliende arreo e piusu imposturas non creo. 27. Como tribaglio cun coro cuntentu e mi devo sa domo fraigare Annamaria pensa a t'allegrare non ti ponzes perunu pensamentu chi prestu ad'a benner su mamentu d'esser felice, cuntentos umpare e como d'ogni 'orta chi t'iscrio sos soddos de sa paga a tie imbio. 28. In favore mi siede su destinu tantu innoghe comente in totue non mi turbe sa mente carchi nue de mi truncare in pese su caminu tue chircadi prestu su terrinu de fraigare ue cheres tue e faghemilu ischire prontamente chi deo corrispundo frequente. 29. Ispero su terrinu chi l'agatas cominza cantu prestu a fraigare ca deo sigo sempre a tribagliare sas ideas mias sunu isattas apena chi sas domos sunu fattas tando podimus in paghe isposare apo a faghere dogni sacrifiziu fin'a s'ora de s'isposaliziu. 30. Pero ti prego tantu cara Nina chi siese sempre cuntenta e galana si pro casu connosches a fulana lassala andare chei sa chisina isco chi este una mala ispina dae cussa runza istadi lontana cando la bides girali sa pala c'andede issa sola in ora mala. 31. A totu su chi naro pone niente pro issa non ti ponzes in anneu a cussa limba già la pagat Deu bides ch'este una impertinente tue abbarra sabia e prudente isculta solu su cunsizu meu e mantene s'idea tua fissa lassala perder mai s'idad'issa. 32. Pro issa non ti ponzes in impiciu deves amare a mie cun ardore si deo apo fatu carchi orrore no l'apo fatu pro veru capriciu e puru est beru lu nara su diciu s'ingannu torrada a s'ingannadore però si custa 'olta m'ana illusu custa è prima, ultima e non piusu. 33. Sas limbas malas ateru non desizana subra a su fatu anzenu s'infiammana ateru bene sas limbas non bramana sa bona idea anzena la fastizana e de su male insoro non s'abbizana solu disturbana sos coros chi s'amana istana sempre seminende ispinas ma sunu de sas peus raighinas. 34. Vivene de continu in su burdellu però pro parte mia las ignoro mai piusu deo m'addoloro cantu poto li serro su gancellu ca no ana rispetu e ne decoro de sos amantes sunu su fragellu deo pro cantu duro biu e sanu dae cussa zente che passo lontanu. 35. Ancora so pensende bene a fundu su tranellu de custa iscellerada s'idea non fi male preparada de mi truncare sos passos in tundu ma deo tottu pracidu e giocundu apo 'bene sa cosa istudiada si torro a bidda mia e sanu so sa paga chi si merita li dò. 36. Pro cussu ti prego tantu Annamaria risponde sempre a mie frequente passa puru su tempus allegramente e abbandona sa malinconia continu pensa solu a mie ebia faghe chi sies a mie presente ista cuntenta e pensa solu a mie comente deo puru penso solu a tie. RISPOSTA DE SA FIDANZADA 37. Caru Bobore oe apo rezidu s'iscritu tou tantu desizadu m'allegro chi so giusta m'asa nadu pro su piattu chi t'ana cundidu intantu pagu tempus apo patidu pro s'impostura chi t'ana imbiadu s'ingannu chi fa giutu cussa tizia a issa bi lu giuta sa giustizia. 38. Apo reione de la frastimare a custas peus arga de sa idda chi l'allume de fogu un'ischintidda chi mediu non bi siede all'istudare totu sos ch'andana a l'abaidare chi l'agatene cota che ambidda chi no la sarve Deus e ne santos e siede de sa idda sos ispantos. 39. Como pro mi calmare su dolore cun custa depo ennere a disputa giaghi s'est posta gai resoluta de mi faghere lassare cun Bobore sa die chi m'agato 'e malumore li do surra chi si piscia suta e poi su motivu l'ispiego e si bi torrada sa limba li sego. 40. Zertu ch'a mie non m'este dezente a m'imbruttare su meu morale però custa ada s'animu brutale chi ponede in subugliu tanta zente issa est mala, maligna prepotente chi pensa sempre issa a fagher male custa chere lassada mesu morta a tale chi l'intendada una 'orta. 41. Como s'idea l'apo gai fissa non bi la lasso senza la servire prima de totu bi lu fato ischire ite so deo in paragone a issa e la devo cumprire sa promissa e mi cherzo un'istante divertire tento sa die chi l'agato sola a cussa li cumbenidi cussa iscola. 42. Custu neu mi restada in su sinu pro cantu mind'app'ammentare mi cumbenidi como a mi carmare su àrriu s'acconzada in caminu penso de comporare su terrinu cominzo cantu prestu a fraigare comente iscrittu mi l'ada Bobore e ponzo mente a su perfettu amore. 43. E bi devo pensare a sensu fissu cantu Bobore addurada inie bido chi issu adorada a mie e deo puru devo amare a issu però prestu chi 'enzede in permissu comente so preghende d'ogni die ca deo so fattende su dovere a tottu gustu sou e piaghere. 44. Sa peraula mia este un'attu s'amore est forte, est potente cadena issu pro me est fora in terra anzena e pro amare a mie est tantu esattu non pretendo dae issu unu palattu mi basta solu una domo terrena sa povertade este una vertude sa menzus brama est sola sa salude. 45. Devo pensare a dogni istante e ora pro sa domo chi devo fraigare tòcada a mie puru a tribagliare comente tribagliende so ancora non mi cherzo felice una segnora comente certos si solin bramare nara su dicciu antigu e futuru chi d'ogni pedra accolta est bona a muru. 46. Como su pensamentu meu est mannu però a mie non mi da cumbatta deo pro parte mia so esata a su ghi istimo non li giuto ingannu ispero puru forsi prima 'e s'annu sa domo mia siada bella e fatta e devo tribagliare a tottu prou pro appagare a su geniu sou. 47. Como non appo tantos pensamentos pro ch'appo su terrinu aquistadu sos mastros appo faeddadu sun cuminzende già sos fundamentos e ambos duos già semus cuntentos chi prestu su locale est agabadu sa domo este una cosa interessante e deo a la agabare so costante. 48. Pattimus oe pro godire crasa pro non restare sos coros afrantos de custa idea nostra bind'at tantos chi cherene arrivare a custa basa si nò su coro meu non mi pasa Deu bi siet e tottu sos santos non minde importat si appo a sufrire s'idea l'appo e bi devo arrivire. 49. Certu non fato comente a fulana ch'est sempre in giru senza tribagliare fatu sas domos andende a ispiare a bucca aberta chi parede una rana sia coiada o siet baiana issa devede a tottu criticare est sempre in giru de continu motu sa beffe e sa zantara de tottu. 50. Deo istimo sempre su tribagliu sos mastros sun sa domo fraighende Bobore puru est sacrifichende parat su pettus sou a su bersagliu deris a mie at mandadu unu vagliu e pro sa domo lu so ispendende però non chirco a caiu ne a tiziu chi pro campare bi cheret giudiziu. 51. Sun già ses meses chi Bobore est partidu dogni mese su vagliu m'at mandadu ma deo bene l'apo impreadu chi su locale est mesu cumpridu seschentas miza francos apo rezidu no mi l'apo in durches isprecadu in custa domo b'est sa parte mia treghentos miza francos chi tenia. 52. Deo no mi las giro sas piattas comente zertos ch'andana a girare mancu soddu a neunu devo dare e mai cosa leadu apo a trattas cando sas domos mias sunu fatas e deo tenzo pagu ite pensare fat'apo duas cameras e coghina e non devo a niunu una sisina. 53. Ecco Bobore a s'annu è torradu prosperu e sanu comente è partadu e carchi sodigheddu ch'à batidu luego a mie mi l'ada intregadu e cun totu ch'à tantu tribuladu già ista bene e pro nudda at patidu e como cantu prestu preparamus su die de so santos isposamus. 54. A primavera è torra de partenzia totu s'istiu ch'abbarrada inie e forsi ad'à giughere puru a mie e deo so cuntenta a preferenzia chissà chi sa devina providenzia poded assistere a issu e a mie ispero chi mi giute de seguru a sumancu tribaglio deo puru. 55. Creo chi sie giustu su pensare si ponzo fatu a su meu isposu bido issu è tantu generosu e deo puru lu devo agiuare mi ponzo deo puru a tribagliare poi a s'ierru faghimus reposu cantu duramus sanos in gioventura tocada a su tribagliu tenner cura. 56. No è malu su nostru pensamentu s'amare su tribagliu est unu incantu in favore bi siede d'ogni santu de andare e torrare cun assentu giaghi Bobore est gai cuntentu deo puru so cuntenta atter'e tantu non poto narrer chi semus diciosos ma siana che nois totu sos isposos. 57. Unu consizu a s'amigu emigrante li do a gustu meu e piaghere chie at bisonzu de leare muzere devet essere a sa femina costante bi cheret puru animu bastante in su tribagliu pro giustu dovere tando pro issu sa sorte est comuna sola sola li curret sa fortuna. 58. Prego a dogni sardu paesanu su chi este che a mie in terra istranza non devet fagher mai vida lanza ch'est dovere de ogni cristianu devo narrere a chie est baianu de si chircare prestu una cumpanza gai tribaglia pius cun ardore gai isparidi dogni malumore. 59. Ca deo puru cando fio solu fio pienu de malinconia dogni intantu tenio sa mania de m'aviare che puzone in bolu como non tenzo perunu oriolu pro ghi tenzo sa mia cumpagnia e torro a domo mia tranquillu non so che una olta unu mandrillu. 60. Ponide mente a sos mios consizos si cherides arrivire a sos cuncruos dogn'unu pensede a sos dovere suos de afrontare in sa vida sos fastizos nois cantu istamus a tenner fizos devimus tribulare tot'er duos su tribagliu no este una vilesa si podet fagher puru una richesa. 61. Custa è veridade tota canta a su chi naro dade attenzione cando b'este sa paghe e s'unione in dogni domo b'est sa paghe santa s'ada allegrare puru ogni pianta si d'accordu tribagliana in cumone però si b'ada s'idea rebella non podene mai faghere vida bella. 62. Sos contos mios sunt bene traciados si bene s'argumentu giudicades si poi a fundu a fundu l'osservades sos mios paragones sun proados e naro a sos chi sunu innamorados a limbas anzena mai reta dades ca deo pro sas limbas malas issoro guasi perdio sa chi tantu adoro. 63. Ponide mente a s'amigu Bobore su chi bos naro este una sentenzia leade dai me isperienzia ch'apo suffertu su meu dolore cando sezis a fronte de s'amore siedas de s'amore a connoschenzia faghide a sa 'ostra volontade e mai reta a limbas non dade. 64. Cantu mi dura forza inoghe arreo però su tempu no lu passo invanu e prego a dogni sardu paesanu chi feted issu comente fat'eo de s'ierru in Sardigna m'arreo a torrare mi tocada in beranu ando e torro cun bon'armonia sempre d'accordu cun muzere mia.